පූර්විකාව

එක එක විදියෙ කෂ්ටිය සිංහලෙන් බ්ලොග් අකුරු කොටන්න පටන් අරන් අවුරුදු කීපයක් ගෙවෙද්දි යාළු මිත්‍රකම් ගොඩනැගිලා දුකේදි සැපේදි පිහිටවෙන ලොකු කණ්ඩායමක් බවට පත්වෙලා. එතනින් එහාටත් ගිහිල්ලා ඒ අය අතරින්ම පවුල් පන්සල් වෙච්ච අයත් ඉන්න මේ සමාජය ලොකු වචන වලින් කිව්වොත් උප සංස්කෘතියක් විදියටත් හදුන්වන්න පුළුවන්. ඔන්න ඔය කණ්ඩායම ඇතුලෙ ඉන්න කොල්ලො දෙන්නෙක් අළුත් බ්ලොග් එකක් පටන්ගන්න කතා කරගත්තා. එකෙක් තමයි කොස්කොළයා. 2012 සයිබර් සිහින උළෙලට ආපු කෂ්ටිය දැනගන්න ඕන නම කියපුවාම. අනිත් එකා චූ කොල්ලා. බුකියෙ චැට් එකට සෙට්වෙන බ්ලොග්කාරියන් මෙයාව දන්නවා. මතකනේ "චූ කරලා නිදාගන්න".

යාළු මිත්‍රකම් ගැන, බ්ලොග්කරුවන්ගේ සහෝදරකම් ගැන කතාබහ වෙන මේ කාලෙ දෙමංසලේ අරමුණ තමයි මේ බැඳීම ශක්තිමත් කරන්න පොඩි තල්ලුවක් දෙන එක. විහිළු කියන ජාතිය හැදිලා තියෙන්නේ පට්ට ෆිට් එකේ ඉන්න සෙට් එකක් ඇතුලෙ එක එකාව බයිට් කරන්න සහ එක එකාට වෙන අකරතැබ්බ වලට සැහැල්ලුවෙන් ප්‍රතිචාර දක්වන්න උදව්වක් විදියට. දෙමංසල බිහිවෙන්නෙත් මේ විහිළු එහෙමත් නැත්තම් මඩ පදනම් කරගෙන. අපි දෙන්නා විශ්වාස කරන විදියට සයිබර් අවකාශයේ මිතුරෝ කියන්නෙ පට්ට බැඳීමක් තියෙන තමන්ට වදින මඩ පාරක් හිනාවෙලා විඳගන්න ගමන් අනිත් උන්ට ඕනම මඩක් ගහලා සැහැල්ලුවෙන් ඉන්න පුළුවන් සෙට් එකක්. මේ ඉඩ වෙන්වෙන්නේ ඒ වැඩේට. 

අපි අතරෙ ඉන්න ජ්‍යෙෂ්ඨ කණිෂ්ඨ ඕනම කෙනෙකුට ‍දෙමංසලේදි මඩක් වදින්න පුළුවන්. හැබැයි ඒ හැම එකක්ම සහෝදරකමට මිසක් කුහකකමකට ගහන මඩ නෙමෙයි. ඒ වගේම අපි අත්දැකීමෙන් දන්න විදියට ගොඩක් වුන් එකිනෙකා දැකලා නැති වුනත් ගහන මඩ වලින් නම කියපු ගමන් දන්නවා. ඒ නිසා අපි අතරෙ ඉන්න බ්ලොග් ලියන කියවන ඕනම කෙනෙකුට මේ පැත්තට ඇවිත් යන්න පුළුවන්. හැබැයි ඇත්ත මූණෙන්. අපි ලියන මඩක් කියවලා රස විඳලා යන්න එන්න කියලා අපි ආදරයෙන් ආරාධනා කරනවා. ඒ වගේම ඔයාලා දන්න අපේ කෂ්ටියගේ රසවත් දේවල් අපිට කිව්වොත් ඒවටත් තැනක් ලැබෙයි. හැබැයි කෙනෙක්ව අපහාසයට ලක්වෙන විදියේ ඇනෝ කමෙන්ට් දැම්මොත් ඒවා ඩිලීට් කරන්න වෙනවා කියලත් මතක තියාගන්න.

එහෙනම් හෙට ඉදලා මේ පැත්තෙ ඇවිත් යන්න එන්න. ඒ වගේම කවදාහරි ලඟදිම දවසක දෙමංසලේ ඔයාගෙ නම තිබුනොත් තරහා ගන්න එපා කියලත් ආදරෙන් මතක් කරනවා.

"මඩ සහ විහිළු කතාවන්...

රස විඳිනට තුටිනා...

අද මෙහි පැමිණා...

පිළිගමු මිතුරනි සොඳිනා...."